Matthew 11

Yeesus Yon Baptais opora maek

(Luk 7.18-35)

1Aria Yeesus ona teeria uuwowa wia sesekami opor amisa wiep-puami wia piipuap kame nain soomarek. Owow unowa nain wiar soomaremi Mua Maneka opora wia wafuromami wia maakem-miek. 2Ne iir nain Yon Baptais koora ekap ikok Yeesus Krais maa unowa onomakek nain meta wiar miimak. Naeya ona teeria wia sesekeya Yeesus wiar ekapemik. 3Ekapep fuunep maakemik, “Mua Maneka mua sesekowa maek nain makena nos-i e mua oko nan ikua, i nain arewiyen?” 4Naeya wia maakek, “Ni kirep ikiwemi Yon maakeka, maa mauwa urufaman nain ne miimaman nain maakeka. 5Feenap, wi mua mokok opa nainiw maa urufimik, wi paara opap ikemik nain kiiriw soomarimik, wi mua mia gigir mane-maneka ikemik nain pun sariarimik, aria wi ifan kuowa kiiriw opora miimimik ne wi umiwkin wia iikirowiyem. Ne wi mua oram nain opor eliwa wia maakemkun miimimik. 6Aria wi mua, yo kema me efa mika-kofimik nain wi kema eliw ikaikuan.”

7Aria teeria nain ikiwiwkin Yeesus-ke Yon maemi yakeyak maneka feenap wia maakek, “Ni iiriw epa asia nomon manekiw nan ikiweman nain, maa mauwa urufowa ikiweman? Ewar-ke sukuwka ifa wuunoweya kiri-kiriya nain urufowa ikiweman-i? Weetak. 8Nain ni maa mauwa urufowa ikiweman? Mua oko mia suuwow eliwa wuiya nain urufowa ikiweman-i? Nain pun weetak, wi mua bala ele-eliwa wuimik nain owow saria maneka koora-pa wiar ikaimik. 9Nain ni maa mauwa urufowa ikiweman? Profet oko-ko urufu naep ikiweman-i? Aa, pepek. Yo makena nia maakiyem, o profet-ke, nain wi profet unowa wia nomakek. 10Iiriw Mua Maneka opora siisimep-puamik nain mua makena naneka. Mua Maneka-ke o naep muuka maakek,

o miime, ikoka sesel mua oko sesekinen. Ne os-ke miimep ikiwemi no era eepominon.’
(Malakai 3.10)

11Yo feenap maken akena nia maakiyem, makena, mua unowa miiwa-pa imenaremik nain Yon Baptais-ke wia nomakek. Nain wi Mua Maneka pika kemena-pa wiar ikemik nain wi mua oram akena nain-ke o nomakikuan.

12Aria Yon opora wia maakem-miek ara nain ekapep aakisa ara fan, wi mua samora ne kekanowa-ke Mua Maneka pika wiar teeku naep onimik. Ne mua samora-ke irakowa purupimik. 13Wi iiriw profet unowa nain opora kuisow nainiw ookam-ikaiwkin ikaiwkin Yon imenarek. Ne Moses sira wuomakek nain pun opora kuisow nainiw mikap maek. Ne aakisa epa nain imenarek. 14Iiriw wi profet oko Elaiya saarik imenarinon, naap maem-ikemik nain Yon nanek. Ni opora nain makena naowen-i e weetak, nain niena maa-ke. 15Ni ifana onaiya ikok-na baliwep miimap kema suuweka!

16Nain wi aakis teeria fain maa mauwa maemi sira wiar pepekiminen? Wi teeria faa, wi takir galagala saarik. Feenap, owow uruma-pa pokap ikok teeria oko-ke teeria oko wia faremi maimik, 17‘I pia nia fuuromamkun ni ufowa miatiniman. Ne salel awemkun ni me omomiman,’ naap wiam maimik. Wis pun naap ikemik. 18Iiriw Yon fan ikua nain maa enowa ne eka kekanowa enowa emi wuam-ikua. Naeya wis-ke maemik, ‘Sawur-ke mia-pa wiar ikua aa,’ naap maemik. 19Ne aakisa yo Mua Muuka ekapep maa enowa ne eka enowa emi me yame wuamkun efa maimik, ‘Nee, mua faa, maa enow masia, eka erua. Ne wi takis aawow mua ne wi pina mua womar-ke.’ Naap efa tuunimik. Nain wi eena Mua Maneka amisa wiar aawimik, wi nain-ke ariman wiar wuami wia ofakowikuan, amisa nain maken akena-ke.”

Wi Yeesus opora me wiar opimik nain kema samorarek

(Luk 10.13-15)

20Aria wi owowa iiriw Yeesus-ke owowa-pa wiar ikok maa miililina onam-miek nain urufap kema kirep sira samora me piipuamik. Naapeya wia amukaremi maek, 21“Aa nefa komarka, ni Korasin ne ni Betsaida, ikoka yoowa aawowen. Yo iiriw ni niar ikok maa miililina nia ofakowam-ikemkun kema me kireman. Nain yo ikip Taiya ne Saidon-pa onekam-na wi iiriw kema kirekamik, pina onamik muuta nain konim irina ainep foma yakiep ikekamik. 22Yo maken akena nia maakiyem, ikoka Mua Maneka ni sira samora nain nia mekawow epa-pa neeke ni pina maneka aawowen, ne wi Taiya ne Saidon pina maneka me aawikuan. 23Aria ni Kapeneam, ni niam purupep iinan-pa niam wuau naep-i? Me pepek. Mua Maneka-ke mukuna-pa nia wafurinon. Moram iiriw maa miililina ni niar ikok onam-ikem, nain ni urufap kema me kireman. Nain iiriw Sodom-pa onekam-na wi kema kiriwkin owowa me mesenalekak, naap ikaeya epa fain epekak. 24Nain yo feenap nia maakiyem, ikoka Mua Maneka nia mekawow epa-pa neeke wi yoowa maneka me aawikuan, ne nis-ke yoowa maneka aawowen.”

Yeesus wiar ikok kema eliwa aawowa-ke

(Luk 10.21-22)

25Ne iir nain Yeesus-ke opora kerewa maek, “O Auwa, owow iinan ne miiwa fain onoma nos, yo sira eliwa nefa naiyem. Moram, maa unowa kokot ikua nain wi mua kema ne amis onaiya ikemik nain me wia ofakowan, ne wi mua takir kema saarik ikemik nain wia ofakowan. 26Makena, Auwa, sira naap nain nena kookalowa-pa onan. 27Maa unowa yena Auwa-ke yo wapena-pa efar wuak. Mua kuisow Mua Maneka Muuka me wiar amisarek, Auwa ona waisow Muuka amisarek. Ne mua kuisow yo Auwa me efar amisarek, ne yo o Muuka-ke yaisow amisarem. Ne yo yena kookalep yena Auwa mua papako wia ofakowamkun amisarikuan.

28Ni mua unowa uuwow yoowa opiman nain ne kema pinarep ikeman nain yo efar ekapeka, ne yos-ke kema sonom eliwa niinen. 29Moram yo yaisow mua kema sonom eliwa ne yo yena yame poraiyem, naapeya yo efar ekapep efamiya ikok yo sira efar aaweka, naeya ni kema eliwa imenowen. 30Moram yo uuwowa niemkun akuawiman nain yoowa marew. Ne ni akuwisa-pa niar wuiyem nain pun yoowa marew.”